口德

有時做人真係唔好咁招積

話說幾個星期前,舊同事跟我說

"昨天同事A話食榴槤好燥,唔好食咁多"

舊同事回應"我又唔會喎,我食榴槤食多多都無乜問題的"

誰不知佢就係咁招積,晚上食完榴槤(我唔知佢食咗幾多)

第二日就生到成口痱滋

仲要嚴重到去看醫生

佢就將呢件事同返我講

"嘿...............我都好耐無生過痱滋了!"

我亦唔信邪,招招積積巴屎閉驚死人唔知咁

重覆又重覆咁同舊同事講以上句白

第二日

我飯後慣了食香口珠

一食就要打孖嚟

一咬

.

.

.

.

.

?

?

白痴架我

我竟然咬到自己條脷

流血不止

痛到我淨係識得坐咗係做

乜到做唔

比我亞姐看

她說"嘩.你做乜咁睇唔開,要咬舌自盡呀!"

"你一定會變痱滋!"她後補說

不只她一人,我比親人看,別人都係咁講

呢D係咪叫開口夾著脷呢?

不過,慶幸我粒"痱滋"是一粒不痛的"痱滋"啫

.

以前幾份工都無乜嘢做

我嗰時好羨慕別人係公司好多嘢做

覺得咁既人生先好有義意(?)

誰不知,現在我公司真係有許多嘢做

乜狗屎垃圾都好似關我事咁

平時準時六點收工

現在要OT到六點幾甚至七點幾

對我嚟話已經係極限

(所以非常服佩晚上八九點都未走的人)

原來做人真係要積下口德的

4x100再乘25=健康

很喜歡食蛋糕的cream

一路都覺得自己肥

但係我從不會選擇節食減肥

因為已經有點簡飲擇食

還要我去節食減肥

簡直慘無人道

寧願多做點運動還好

.

六月跟個朋友仔一起去跑步

別人一分零九秒買了兩個4x100

我呢?五分鐘才跑得兩個圈

從不介意跑得比人慢

我們又不是去參加比賽

跑步只是為健康

5min / 2圈已經足夠了

現希望夠氣跑足25個圈

25個4x100 = 10公里馬拉松

亦希望呢股跑步熱唔好係三分鐘熱度

祝所有六月生日者

永遠幸褔,健康,快樂,活潑,阿門!

速打

. 是我們諗的太多,太完美嗎??
但是就咁up都令人好興奮
三個月後,希望有點成績吧!!

. 另英文考四科,有三科合格
唔合格那科,補考都合格
超超超開心!!!!!!!!!

. "無呀,好耐無打電話比你睇你死咗未咋!"好友A打嚟第一句的對白
放心褔大命大未死的!

. 六月與好友R展開"健康人生計劃",希望唔好三分鐘熱度啦!

. 看完幽遊白書,愛上看亂馬1/2,但是有人話呢套係咸濕卡通,但係我覺得好搞笑喎!

. 朱朱古力雪條超好味,十個正!!!!!

. 好喜歡食一粥麵的焗肉醬意大利粉,十個正!

. 超想踏單車,真係好想好想

. 好想買鞋,好想好想

5月18日 大吉

五月十八日 大吉日

宜 生日

宜 返新工

逄該日出生者 必定心地善良,和藹可親,大好人一個

逄該日返新工者 必定事事順利,長長久久

願像向日葵般日日面對晴朗天

沒有redbull,但都送你們一對翼

毒蚊大作戰!

發現對上打blog係三月尾,真係好懶..
今天突然想打返的原因是...............一隻蚊
話說一直都好自豪蚊蚊不會咬我,只會咬我二姐姐
深信蚊蚊是我的好朋友,良朋知己
朋友是不會自相殘殺吧
所以每逄二姐姐被蚊咬,我總會講埋d風涼話 (超賤!)
誰不知,有咁耐風流有一夜折墮
昨晚被一隻超惡毒的蚊咬我隻腳
總共咬了三大口以上
嘩.............痕到乜咁呀
又懶得起身,抺腳塗"無比膏",唯有死忍
但係痕養的感覺沒因我死忍而減退,
只是好痕~好痕~好痕~x100倍
唯有死死地氣落床抺腳搵藥塗
當抺完腳搵極都搵唔到"無比膏"
此時二姐姐給我一支"特強無比膏"
(以前咁對佢,佢竟然都借支"特強無比膏"比我,好感動!!)
特強果然好勁,一塗過了幾分鐘
完完全全沒有痕養的感覺~
果然成日被蚊咬的人經驗係最好的
塗完無比膏諗住再瞓返啦
點Q知,在耳邊有如軍炸機咁~"嗡"了一下
嘩.............那一下聲音真係超恐怖呀
於是用了PLAN A計劃
用香水係床到噴了幾下
慕求隻毒蚊飛出街..........或飛上上格床
可能轉了蘋果味香水唔太Work
(以前西瓜味香水好Work架!)
隻毒蚊都係耳邊"嗡"的一聲飛過 (真係好恐怖架!!!!)
唯有用PLAN B~~就係搵紙係床到不停搧,不停搧
亦是慕求隻毒蚊飛出街..........或飛上上格床
自以為好成功啦
估計昨晚的蚊不是平時同我好FD的蚊蚊
依然要咬我,及在耳邊嗡"的一聲飛過
大佬呀,雖然明天不用返工
但都唔好搞到我無覺好瞓啦
好~最後方法~開~冷~氣
等你凍鬼死 (好明顯係一廂情願的諗法!)
但是開了冷氣之後,毒蚊依然係房內自由自在地飛翔
救~命~呀~我~想~瞓~呀!!!!
失去理性的我,唯求趕走隻毒蚊 (知同佢鬥唔過架啦,都無諗住殺佢,放過我好嗎?)
不理房規,~開~燈~
我的朋友應該知我房有個不明文規則~不準無辜開燈
除了做功課或得某人批準或某人不在家時
一律都不可開房燈
要光嗎??那你鐅壁偷光吧!或者站在廁所門口用光吧!
總之房規是不能開燈啦!
(認真的題外話 : 就連相機按多幾下都會比人話浪費電源!)
好啦,講返隻毒蚊先
開了冷氣及燈後,終於見到搞咗我成無覺好瞓的毒蚊
本想一嘢拍死佢,但是手腳太笨拍不到
見佢飛近門口,用了張紙一嘢推咗佢出去
~關~門~大~吉~一~天~都~光~晒~YEAH!!!

雜頊II

21/03/2009和gigi去咗做義工,係體驗坐輪椅的滋味
講真咁大個女都算好好,無乜大病痛,行的走的食的瞓的!
真係咪試咗坐輪椅出街囉!!
嗰次坐一次發現平時短短中環-->上環的路綫
差不多擾攘了三小時才到+坐在輪椅上真係好多路都要兜路行,萬分之不便~
當坐上去時總覺得別人眼光不太友善(心埋作用?定作賊心虛?)
再加上推輪椅之滋味也不見好好受,嗰日人多
如一梯樓梯推不到都有幫下手
但係如果屋企真係有人要長期坐,別人又可以幫到幾多呢?

.

近排公司好多嘢做,發覺d嘢越急做越黑臉!
都好興幸自己仲有份工,有天同坐食山崩的人講
"好彩係你無嘢做咋,我現在無嘢做既話,實無咁快搵到,到時真係食殼種啦!”
有工返都咁窮,無工返待業到唔知幾時,真係死得人lu!
我要好好珍惜現在擁有的東西
所以呢~買電話這奢侈決定無限期押後!!!
.

22/03/09去咗長洲
真係唔記得對上嗰次係幾時去了
講真其實嗰日都有d唔係好想去
天陰陰,彷彿像會下雨一樣
(事實係嫌車費貴)
但答應咗就費時甩底
So far嗰日都玩得幾開心
百無聊懶咁hea吓,行吓,玩吓,食吓,睇下人放狗呀,無聊吹波波
都幾舒服~~~
我比10個”正”長洲一日遊啦
.

呢排喪食朱古力
食足一星期有多
放學後亦不甘示弱(?)去食朱古力雪糕
咁食法會有糖尿病嗎?
.

19/03/09補返聲生日快樂!!
你亞媽生日時記住同我講返聲喎!
那排朱古力快快吃了它吧~
否則,溶了,酸了,發霉了,就浪費了!!
.

前世未看過戲嗎我?
為什麼選擇28/03/09一日看三套日本電影??
但是,開心直航好似好好笑咁喎
屯門早場$25蚊咋喎!
而k-20有金城武
咁靚仔唔睇又唔得喎!
上次佢套甜言蜜雨無看幾後悔呀我
咁禮儀師之縐眉曲
好似又幾ok咁囉
最最重要係屯門看戲平吖嘛
三套加埋都係100蚊………….
.

近期追看幽遊白書
不明,為什麼主角仲是打不死?
心地好的敵人,也是不死的?
咁被打法,為什麼沒有面腫口腫,骨折,內傷,內出血,入院?
世界上真的有妖怪嗎?
.

唔知點解好好好討厭朋友稱呼我為"譚小姐"
真的好不喜歡,無解的
不喜歡就是不喜歡
當我是朋友的話,別再這樣叫我吧~謝!
.

上星期聽到一句說話
雖然唔係同我講,唔係答我,唔係話緊我!
可以說是那句說話~完~全~唔~關~我~事~
但係聽到後,好唔鍾意囉!!!!!
為什麼有人真係可以咁幸運?
不是說什麼,但是有時真係好睇唔過眼
之不過我又憑什麼身份話你呢~
但願你一世好運!!

我的頭髮

終於覺得自己的頭髮長咗了
由於本人的頭髮向來都是龜速生長
上年9月長至加拿大的頭髮
抵抗唔到又電又染下,已宣佈死亡
所以把心一橫走咗去剪到唔點肩
9月至本年2月期間
並沒有去過髮型屋剪過頭
到了2月時就趁新年後去搞搞個頭
點知比bobo (髮型師) 話我
"嘩,上次見你到現在淨係長咗咁少咋!"
鳴............我都唔想架!!
不過話說轉頭
真係多得Rachel介紹bobo比我
因我以往無定邊個師傅的
入到去通常都係話
"唔好剪碎,唔好偷薄,唔好剪咁短,最好剪完等於無剪咁修修吧!"
(其實賺我剪髮錢幾好)
想都想不到我未同bobo講呢番說時
她卻跟我說 : "我唔會你大剪架啦,係咁易修修就算,即係剪完等於無剪咁囉!"
good~~~正合我心意,連講都慳返.
好,講返我的龜速生長的頭髮先
bobo話佢有d客用過2001洗頭水生得快咗,叫我試下用
後尾我都去咗看
嘩~很貴唷,差不多成舊水一支
買埋護髮素要成兩舊水
生得慢啫,又唔係地中海
加上友人話佢用過唔work
所以更有決心~唔~買!
後來,知道友人的男友買了霸王
話用了真的又亮又黑
搞到我好現在好想試下用霸王囉
看看是否真得~那頭髮,在動啊很黑!很亮!

雜項

1. 昨天返學玩有自閉!雖然自閉可以當飯食,但係睇唔過眼-->又費時出聲-->所以玩自閉!

2. 講真真係有d嬲,但係...........................算吧啦~返學求知識又唔係為乜,所以堅持自閉!

3. miss及同學甲都問我做乜樹無啦啦坐前咗,唔..................乜有規定要坐邊架咩?

4. 覺得某人好xx(唔識點形容佢)-->但係對著佢又有點愛莫能助的感覺-->幫又唔係,唔幫又唔係-->所以採取不聞不問的態度-->更加覺得自己好似一隻鴕鳥!

5. 呱~呱~呱~我是一隻肥鴕鳥!!

6. 講開肥,上次比肥肥話我 : "你都唔係好肥啫,唔駛減啦!你又高喎,再減得返排骨唔好睇架啦!"

7. 嘿!肥肥,我喜歡你的担白!

8. 我亦想係到澄清~我們三個沒有夾埋一起放飛機的~那飯局真係有點不想去+咁橋三人都有咁諗法 = 異口同聲話唔去!真的沒有夾埋~希望你能明白!

9. 正如你唔想去放狗去長洲,我都無逼你去啦~~~但我更明白,因我答應你話去在先,之後又話唔去,但係嗰時無諗咁多吖嘛!!

11. 衷心~(可能你會覺得我好假)~希望你們嗰日食得開心d啦!!

12. 昨天有朋友問我有無興趣去看3D的電影,講真我有興趣看3D的肉蒲團多D囉!

13. 講真的~真係好想知會點3D法!哇~哈~哈~哈............

14. 好期待呀!快d拍啦!

等放飯

現在在公司好無聊
上網上了幾個鐘,上到唔知有咩好上
上facebook又唔知有咩好玩,都唔明d人點可以玩facebook玩咁耐
更加唔明有些人點解可以上網上成日
可能我公司沒有喇叭,如果有的話,我估我會看電影
公司有無乜單,成朝得嗰幾封唔駛我覆即e-mail
好無聊呀我現在........................
唯一寄託就係快d到一點食飯!

p.s譚氏飯盒出品之飯盒
每個人見到都會話
包括我同事,二姐姐同事(因二姐姐都係帶飯的)及親生大姐姐
"嘩~個飯盒好細,夠唔夠飽架?咪扮細食喎"
"嘩~好多菜喎!咁少肉嘰?"
無錯,我家實施多菜少肉少油計劃,一餐飯四個餸當中有二味半都係菜的
所以譚家飯盒必屬佳品!

粗口

唔....................我懷疑我誤交損友
識到個壞朋友..................................
雖然沒有叫我殺人放火吸毒索K食煙飲酒偷窺偷竊偷亞婆底褲
但係佢叫我講粗口xyz?i#po*et&
當我x佢時
他還勁賤地笑笑口說 "I'm ready,你係咪嚟?"
__________________________________________

其實講真吖,以上全部都係事實
都不太明白d人點解可以每句說話都能夠加粗口上去的
嗰日我地係到玩(?)
每句說話都加粗口上去
發現來來去去都係嗰幾句
(兒童不兒,所以不會舉例)
真係要諗幾時要加隻 / 句粗口上去
同埋又唔得斯文又粗裕又礙耳
好唔明白點解d人可以講得咁流順
講咗粗口又唔係可以識飛
講少句好嗎?

錶vs袋

某天收到某人的電話,內容如下:-

"小玉,如果你有千七蚊,你會買個袋吖定買隻錶吖?"

"隻錶同個袋都係agnes'b架!"

"而隻錶唔駛入電好方便,仲之你帶住就會行的"

"仲有呀!原價二千幾,現在買千七真係好抵....."

某人講了很久都係形容隻錶又幾抵又有幾好

一d都無講到個袋係咩款咩色斜咩定側咩......

其實係佢心目中而下了定論係買隻錶啦

仲打嚟問我做乜喎??

我估佢應該係想搵個人認同下佢買錶抵

等佢都覺得連亞某人都覺買錶又抵又平又好啦

跟住就去買(其實我估佢唔問我都會買,之不過想問下啫!)

其實好多時 / 事自己都做了決定

但是不敢行出一定

同身邊的朋友講,只是令自己更有決定踏出一步啫

作為好朋友的我,係明佢用意的

於是我答了個好明智的問題

"如果有千七蚊的話我會買.............電話!"

飽?!

話說我有個朋友很肥的
但每次和他食飯時,總是第一個話飽的人就是他
於是口賤的我們,仲會取笑他
問他 : "你係咪真係飽架?你唔好係到扮細食,陣間返到屋企食半個公仔麵喎!"
無錯,因為聽當事人講,早餐食一個又唔夠
食兩個又多得滯,個半個公仔麵就啱啱好了
.
前後共兩次被友人話我"眼寬肚窄"
其中一次事沿是,晚上去大家樂食飯
基於本人自覺好肚餓的關係,自以為會食得晒一個焗豬扒飯
所以直接拒絕和別人一半的請求
誰知,肚餓的人食到一半已經覺得飽
最後,那個焗豬扒飯食淨了少半就走了
.
某天放工後,約了朋友到旺角行街
我跟友人說 : "喂,好肚餓呀,食咗先行吖"
於是我們就去咗食飯先
我叫了個饅魚飯,食到一半時唔知點解又覺得飽
於是內心對自己說:"你唔係飽架,你好肚餓,食埋去啦!"
就憑住這信念(?)我就食晒盒飯了
食飽就行...行...行....街了
行完家樂後,我不停地問友人
"喂,你駛唔駛食魚旦呀?食唔食糖水?好想食雪糕添........."
(本來我約他出旺角係掃街,但係我病咗唔想掃,就求其食餐飯就算)
其實我咁問佢,係因為.....係因為我肚餓.
當行完準備要分手時,友人突然說 :"去食巴辣香雞翼囉"
"吓,病喎,唔想食,最多我陪(坐)你食......"
"咁算啦,走吧!"
在車上我倆白痴仍然在SNS
差不多到屯門時,友人突然打電話嚟
當時我還心諗:"死賴鬼,字都唔想打...."
"喂,你話我好不好在樓下買車仔麵啦?"
"買吖,其實我都肚餓,打算到樓下買串牛丸食"
"唉,估不到笑得人多,現在輪到我們食半個公仔麵"
"唓,剛才叫你食雞翼你又唔食,我仲打算你食完,叫你陪我去食糖水添"
"你又唔早講,我們係好朋友嚟架嘛,你咁講,我當時一定會去食雞翼....."
佢就係講完呢句就趕住收線買車仔麵
而我亦落咗車,準備去買牛丸食
誰知牛丸檔沒有開
我還是回家吃餅干,還被姐姐說我包餅好臭!

促進香港經濟繁榮

一月我會叫佢做"至抵消費月"

買了

一件灰色長身線衫

一件綠色衫仔加灰色打底衫

一件綠色長身冷外套

一件灰色樽領衫

一件灰色外套仔

一件黑色打底衫

一對紅色婆仔鞋

只是用了HKD525.7就買到七件嘢

仲要除了頭兩件係普通商店買外

其除五件係K2及contton on (聽聞係澳洲版H&M喎)買的

我真係好精明呀,唔讚下自己都唔都,嘿!

而對紅色婆仔鞋是"2 for 99"

基於驚唔好著+著臭腳的關係

當時只敢買一對(和一個陌生人各一對)

今天第一天著,除了只覺得個底薄咗少少外

及自覺不會著臭腳

於是決定再買同款唔同色

無聊事10,有病事5

1. 今天我在公司很乖唷,一有e-mail馬上回覆,包括私人e-mail啦!

2. 延續星期日k2購物慾.........好好好好想再購物呀!!!

3. 一個黑色袋要$298,紫色要$398.不是紫色size大d,而係個色靚d所以貴一百.都有病(1)的,又唔係名牌子,駛唔駛咁串呀!!

4. 我真係有病(2),星期六病到現在仲未好返,以為食咗感冒茶會好,點知都係咁!忍唔住食返幸福傷風素.

5. 有病(3)係到諗,我亂食成葯會否猝死呢?

6. 別人去(完)日本,叫買朱古力餅.這行為好小朋友咩?但我真係好想食喎~

7. 辦事不力,你應該print定個圖去日本吖嘛!記憶又唔係好,現在搞到我無得食了,可惡!

8. 有病(4),訂了場放學打羽毛球,乜真係想打成咁咩??

9. 有病(5),別人拒絕了還要問.問.問!不過都有成功檔案的.只要有恒心,鐵柱都可磨成針!!!

10. 開學飯,好好好想食貴價漢堡包呀~

九天之新年假

由放假的第一天除了去了最遠的荃灣閒逛外
基本所以活動都沒有離開過屯門
難得星期六可到沙田 / 馬鞍山踏單車
誰知竟然開始作病
喉嚨痛,聲沙,咳................我估再踏一踏單車,吹一吹風的話
好~肯~定~我必病無疑
但我又真真真真的好想踏單車喎!
不過都係等病好先再踏吧~
而星期日去了九天假期最遠之地方~~車公廟
入廟前忍唔住發了個脾氣
其實初一時已經想發的了
但係無理由新年流流同人吵架的嘛
到了星期日唔知點解嗰刻又唔住
狠狠地罵了友人幾句
希望他真係會改啦!!!
而言亦希望我的EQ再高D再高D
這九天假期,雖然唔係過得好充實
日日都瞓到11點幾12點先起身
但係如果日日都係咁過都幾嘆下
不過最最最重要的是日日咁過要有糧出至好!

又係無聊事

哇哈哈~~新年又到了,又例行放多兩天假
總共放九大天假
沒有親戚沒有旅行去
早早預了在家R腳指渡過
為了以防坐食山崩的關係(?)
第一日的半天假期去了打羽毛球看戲
發現左右場打晒,要人追波好過癮
倒頭來自己左右場打就索晒氣(老咗?)
Brad pitt的奇幻逆緣好好看
雖然靚仔樣出得唔係好多
但完全不覺三粒鐘囉
途中,我們都忍唔住大叫"嘩..........好..........靚.........仔............呀!!"
第二天打算去行山,但係敵不過周公
最後去行街看波兒
可能我早早沒有了童真
覺得那套是一個恐怖的卡通片(跟我大姐姐說,佢話我痴線!)
沒有預期咁好好囉,好彩$35蚊啫
戲只餘下"游龍戲鳳"及"馬利與我"想看啫
希望好看啦~~~~~~
祝 新春大吉!!

已寄出的那封信

正苦惱好不好說出我的感受
因為心中的天使一句說話"你想打就打，我支持你!!"
就係因為呢句支持，我決定說出來

我唔係"大食懶"!!!由頭到尾我都唔係!!

我想跟你暫停一下關係吧,我真得很肥很肥,近呢幾次放學都是跟你去吃.吃吃吃,我倆維持友誼之方法除了吃,沒有別方法了嗎??不想別人誤會我是一頭豬 / 發水面包 / 吹脹了的汽球呀!

你做人堅定些好嗎?魔鬼在耳邊立喊時也不要拖我落水喎~關我什麼事呢??擔心不提醒你,遲些越來越放肆,放學會去食宵夜暴肥.

最後,祝福你越食越瘦,二月返學跟你再食過!!!

玉玉上

09格言

去做想做的事

寧願做後而後悔

仲好過沒有做而後悔

by 木村

無聊事123....

1. 昨天食完LUNCH去了惠康,看見有紅豆黑糖面包,那面包比一個手掌還要大些少,買了個和親愛的大姐姐一半,當作晚餐之用.

2. 返學吃完那半個面包而且有點飽,同學竟然請我食朱古力,照食!

3. 返學途中和+2講起,如果放學有車車我們去旺角食亞土就好了,可惜沒有.東拉西扯講到一粥麵的焗意粉超好味,講講下好想食嘢!

4. 於是放學去咗波波食魚香茄子米+檸茶=超飽!

5.可怕的是第朝肚餓 ; 更可怕的~輕咗.........(呵呵呵)

6. 返學時聽到一個唔知算不算鬼故的故事,開頭唔驚!但食完波波後再聽時,竟然起雞皮!!

7. 每夜回家指定動作à路經大堂看看閉路電視à再望望升降機à失望à行樓梯回家又必再想,看到又點呢?

8. 懷疑我大姐姐09年願望是 : 全家每人都有一部相機~

9. 原來跟一個同年同月同日生的人個女,很啱KEY.如果佢生咗仔,我會係契媽定契婆呢?

10. 每次站在新同事旁,總覺得自已好矮.

11. 突然好想換部輕觸式電話!

12. 很喜歡新飯盒,雙層的~可惜個蓋裂咗......

超難忘的2009年1月1日PartII

你們無睇錯我亦無畫錯

條山路真係一直斜落去的

同埋嗰條並不是滑梯唔可以坐係到滑落山

而係有高有高矮的石梯

抽筋者一定會希望嗰條係滑梯囉

於是乎,我提議出 : "不如報警啦,佢點行喎!"

經過一致讚成(查實都係傷者都話報啫,其他人答咩我無理到喎!)

咁就打起我咁大個女第一個999了

我帶著心情既興奮(白痴架我,有咩好興奮?)又緊張又擔心又凍又眼瞓(關報警咩事?)

的超復雜心情打電話了

大約八點幾打完電話

一班人就可始呆坐等救護員來

呆等,食風,吹水,食早餐,讓路比其他人,嘲笑傷者(人來的嗎?但我們又笑得幾開心..........)和救護處講電話

同埋我們比了手套頸巾及要求傷者拿著糖果(賴係有補充糖份咁囉)

扮到好溫暖好溫馨(朋友對他的愛)好痛(因怕他突然唔痛搞到我好似報假案咁)

等呀等

又係等

仲等緊

等等等

等了又等,等了差不多兩小時

終於終於發現有救護員在山腳疑似行緊上嚟

(我無打錯,真係"疑似"行緊上嚟,因為他們等係山腳都無丁點前進過的意思)

終於收到一個飛行服務隊的來電

說大約二十分鐘幾會有直升機到

屆時穿黃衣者係山上跳幾下吸引注意

(六人的衣著係黑黑黑淡藍黃紅(傷者) )

吖..........打錯字,係要穿黃衣者係山上揮手啫

而那黃衫者正是本人

當我好認真地發up風時(要跳幾下吸引注意)

kathy應然好認真地講 : "吓,你講真架?

唉,kathy乜你第一日識我咩,講下之嘛,咁講邊有笑喎

過了廿分鐘後,真係見到一輛直升機來了

正確來說由報警到見到"真"直升機,前後都等了三小時............

(當時真係有許多"疑似"直升機聲係耳邊飛過架)

那有型的飛行服務員由繩下滑到山上

看看傷者並問了幾條白痴問題

救護員 : 你係唔係抽到入行唔到呀?

傷者 : er..............

kathy好明顯睇唔過眼 : 當然啦,唔係我們都唔報警啦!

救護員又問 : 咁你要不要入醫院呀?

傷者依懵成成咁 : ar...............

唔記得我定kathy又忍唔住口 : 當然要入啦!

救謢員心諗 : 呢條xx吖,又唔係問你搭咩口喎!

就係咁救護員就同對講機講d英文就叫傷者等陣

此時,直升機係到試位,睇下邊到可以釣傷者上機

試了一會,個救護員就同我們講

"你地聽唔聽到d風吹緊架直升機呀"

對不起,我們前世未見過直升機,點鬼知風吹直升機係咩聲喎

等了一會,救護員叫傷者行落小小好方便釣佢上去

88了,你就好啦!唔駛行落山,山下見.

六人變五人山繼續要行

由於真的又凍又熱又累又眼瞓又憎行下山的路

我又變成大大大大大大大包尾了

包尾唔緊要最緊要安全啫

在落山途中消防處又打電話比我同我講

"譚小姐,你個朋友現在點呀?"

我 : "佢飛走咗LU,我現在碌緊落山囉!"

消防員 : "哦,咁就好了,因為消防員途中遇上第有傷者,所以救咗去先"

我心諗 : "咁都得??"

最後12點幾終於落到東涌和傷者會合食飯

例牌問了她超多白痴又無聊的問題

09年希望各位都健健康康

因身邊朋友唔係傷風咳或大病

而係好多小病

仲之要健康啦!

超難忘的2009年1月1日PartI

話說約了朋友仔去鳳凰山看2009年第一個日山
於是我們一行六人 (本來一行七人,明顯有人甩底)

浩浩蕩蕩(?)乘坐11號大嶼山巴士慢線向佰公坳出發

到達目得地,嘩嘩嘩.........超爆勁多人準備 / 已經出發

我們也去去廁所,拉拉根(係咁易)

去到山腳已經開始覺得凍

但某人(姓張的)話行行吓覺熱喎

要除衫喎,我們也說叫她別逞強,但她說OK喎

於是係咁除係咁除係咁除(無錯,我係誇大咗小小,佢淨係無著褸,拉高衫袖啫)

上山路係行石梯行石梯行行行行,仍然係行石梯(今次我無誇大架)
行到咁上下嘩~~~~~乜樹呀,咁X凍嘰("X"字請自行加上去)又大風喎
去到一些當風沒有草石遮當的地方
真係差點兒行不穩
忍唔住都要大聲叫~~~~好Q凍呀(我真係唔想有人病呀!!!!-_-)

行下抖下又行下又抖下

本來話三小時到頂的時間

我估都行咗成四五六個鐘

原因除咗真係好凍行唔郁之外

最大大大大大大大大大大大x100000倍原因係

有人抽筋呀!!!!!!!!!!!!!!!!!!!!!!!!!!!!

佢真係抽到唔郁,仲係到呻吟

真係呢~見到佢都慘慘慘

除咗登佢慘,替佢孭背x,陪佢休息講下癈話分散佢注意力之外

真係諗唔到咩方法了

我們嗰時係山腰,上又唔係,落又唔係

而個事主又話休息吓好d行到

於是就繼續上山繼續吹風繼續凍(現在諗返其實我們係咪應該落山比較好呢??)

上到仲爭十幾廿步就到山頂時

由於09年第一個日出關係
山上超爆勁多人,我懷疑山上有成過半千人係到囉

基於-->有傷者+寒風刺骨+上到山頂都無位=決定唔上山頂
在仲爭十幾廿步的地方找個有石有草唔阻住人上山的山邊坐下來了
傷者仍然痛極呻吟
但要明白呀,抽筋唔同傷風咳呀喎有葯食架喎

我們只好替 / 看佢按摩按摩按摩..................

當他沒有呻吟聲時久不久叫叫他,知道他有沒有事咁囉

真係唔知仲可以點幫到他

在山頂下小小,呆吹寒風,等呀等,等呀等

一來等他不再抽筋

二來上山目得係睇日山呀

太陽伯伯快d出嚟啦,好凍呀!!!!! (路過的行山人仕話得兩度咋>_<")

心中哼啫一著歌"風呀吹呀吹呀吹,經過無數的考驗..............."

等了無記錯的話,係等咗兩個鐘終於見到太陽伯伯的頭殼了

太陽伯伯:你好靚呀!!!風先生:你好凍呀!!!

你地睇我隻礸介幾閃

等你咁耐先出嚟,等我捉住你睇真d先

真得好靚好凍加上見傷者又話ok不再抽筋

所以決定走人了

此時,問題來了.我們要原路上原路落吖?定係上埋嗰幾十級去第二邊走呢?

由於上嚟時d石級都幾高幾斜下

加上問其他行山人仕邊邊易行d

他們話上山頂嗰邊會易d喎

無理由唔信人架嘛,加上傷者都同意行嗰邊,所以就準備落山了

嘩嘩嘩~不是我浮誇,呢個係事實

山上面只有大約有五六百幾呎的地方

原來已經堆積了很很很多人,我估呢,真得有過百人架

塞了一會兒人之後,就真係要落山了

行行行行,本人最討厭下樓梯的,真係多的d中學同學比我d暗影囉

越行越慢包尾我預咗

正所謂小心駛得萬年船,我唔想咁扑親要同伴要照顧多個囉(我真係一個有同情心的小女孩呀)

行行下去到去一個位置見到同伴們停咗係到,乜樹呀???唔駛等我喎

原來他們唔係等我,而係傷者終於頂唔順行唔到

見到佢辛苦個樣呢~真係好想孭佢落山

若然我係一個落山天才+可以三行四跳地落山+傷者對我的絕對信任=發夢

由於之後的路真係好斜(深感比人昆咗)

(唔知點解upload唔到相喎,下一篇續)